6/02/2016

56. මම නුඹට ඇත්තටම ආදරේ නැතුව ඇති (Reposting...)


නුඹ මගෙන් වෙන්වෙලා
දුරක ඉගිලෙන දාට
හිනැහිලා ඉන්න එක 
නම් සැබෑ ආදරේ
මම නුඹට ඇත්තටම 
ආදරේ නැතුව ඇති

තුරුළු කරගෙන රැක්ක
වැහි කඳුලු ගිලිහිලා
කතර තෙත් කරන හැටි
අහස උන්නද බලා
එහෙම මට හිත හදා 
ගෙන ඉන්න බැරි නිසා
මම නුඹට ඇත්තටම 
ආදරේ නැතුව ඇති

නෙත් ඉමේ දඟ කෙරුව
නිල් ගොයම හැර යද්දි
හිත දරා උන් නමුදු
ඉපනැල්ල තනිවෙලා
එහෙම මට හිත හදා 
ගෙන ඉන්න බැරි නිසා
මම නුඹට ඇත්තටම 
ආදරේ නැතුව ඇති

නුඹ මගෙන් වෙන්වෙලා
දුරක ඉගිලෙන දාට
හිනැහිලා ඉන්න එක 
නම් සැබෑ ආදරේ
ඇත්තටම මම නුඹට 
ආදරේ නැතුව ඇති





...............

4/19/2016

55. වීදියේ අපි...


ගූගල් ස්ට්‍රීට් එකෙන්
ඔයාලාගෙ ගෙදර ඇවිත්
ඇතුලට යාගන්න බැරුව
කැරකි කැරකි උන්නා මං

ඉස්සර නම් බයෙන් උනත්
කෙළිම්ම ගිය හැකි ඇතුලට
අවුරුදු කීයක් උනාද
හිතා ගන්න බෑ ඇත්තට... 

මිදුලෙ තිබුණු රන් තැඹිලිය
කපා දාල වගේ නේද? 
ඇඹරැල්ලා ගහනම් ඔය
තියෙන්නෙ තව අපූරුවට. 

මතකද අපි උන්නු විදිහ
සිමෙන්ති බංකුවෙ හවසට
කාලේ ඒකෙ තිබුනෙ
සුදු පාටද කොහෙද නේද..? 

මල් ගස් නම් හරි පුදුමයි
තාමත් පණ තියෙනා රඟ
තණ කොල ටික මැරිල ගියේ
වාහනයක් වත් එනවද?
 


ගේට්ටුවත් ඇරල දාල
තාප්පෙ කොලපාට ගාල
කාගෙද අර පුංචි ඇඳුම්
ඇනෙක්සියේ බබාලගෙද..?



4/15/2016

54. නාරං කැවුම්




ඉස්කොලෙ නිවාඩුව දුන්නාම ඒ කාලෙ
දුවගෙන ගමේ යන්නෙ නාරං කැවුම් කන්න

තකහනියෙ මං එන්නෙ ඇයි දන්න කිරිඅම්ම
නාරං කැවුම් හැදුවෙ වතාවතකට වාගෙ

කහපාට පිටි එකේ තව මොනවදෝ දාල
හදපු ඒ කැවුම් ටික දිවිය ලොකේ රසයි

පැණි පොලුයි අත්ගුණෙයි පොඩි උන්ට ආදරෙයි
එක් වෙලා වෙන්න ඇති ඒ තරම් රස උනේ.

කිරිඅම්ම ගිහිල්ලත් අවුරුදුම හතක් දැන්
පුරුද්දට වගෙයි අපි මහගෙදර ගොඩ උනේ

මැද සාලෙ තේ මේසෙ කැවුම් අතිරස මැද්දෙ
දකින්නත් පුදුමයකි මෙන්න නාරං කැවුම්!

දෙක තුනක් කා දැම්ම නාරං කැවුම් හින්ද
කඩේ ඒවද මන්ද මේ තරම් හයි උනේ

හොරට පැණිපොල් දාල පදම වැරදිල වාගෙ
පුංචි දොඹ ඇට තරමෙ නමට නාරං කැවුම්

නුඹ උන්න නම් අද කියාවී" මේව නම්
හොඳයි නාරං කැවුම් දැකලවත් නැති උන්ට!"

4/11/2016

53. මේ සැරේ අවුරුද්ද





මේ සැරේ අවුරුද්ද
ඔහේ ඇවිදින් යාවි
"මෙමරි ෆුල්" වෙනකම්ම
සුබ පැතුම් නම් ඒවි

සුබ පැතුව උන් ඉතින්
කැවුම් කිරිබත් කාවි
මගේ කිරිබත්  කැවුම්
කවුරු හරි කා දාවි...

සූරියා වටේ ගොස්
යළිත් මීනෙට ඒවි
ඔහොම යන එක නුඹට
කවද හරි ඇති වේවි

කොහෝ උඹටත් ඉතින්
කිව්වාට අහනවැයි...
නිකරුණේ කෑ නොගහ
උඹෙ වැඩක් බලාගන්!




4/07/2016

52. පුංචි පුළුං වලස් රාල...







පුංචි පුළුං වලහෝ
පුංචි පුළුං වලහෝ

පුංචි උනත් ඔහේට දැන් තියෙනව ලොකු වැඩක්...
මං දන්නව ඔහේ ඒක කරාවි හරි අපූරුවට...!

දඟ කරන්නෙ එහෙම නැතුව...  
බොරු කියන්නෙ එහෙම නැතුව
බයි ටික ඔක්කොම කාලා
කුක්කු ඩිංගකුත් බීලා

මූදු හතෙන් එතෙර වෙලා  
කඳු අතරින් පියාඹලා..
කවදා හරි එනකං මම
උණුහුමටම තුරුල් වෙලා  
සැපට නිදන්  ඉන්න ඕන...

කවදා හරි ආපු දාක
සිද්ද වෙච්ච හැම දෙයක්ම
අහන තුරා ඉන්නෙ නැතුව
මගේ ඔඩොක්කුවට වෙලා
ගිරවෙක් වගේ කියන්නෝන

පුංචි පුළුං වලහෝ
පුංචි පුළුං වලහෝ

කවදාවත් ආයෙ එන්න
බැරි වී ගියොතින් හෙම මට
කලිං කියපු රාජකාරි
අකුරට ටු කරන්නෝන

දඟ කරන්නෙ එහෙම නැතුව...
බොරු කියන්නෙ එහෙම නැතුව
කඳුළක් වත් වැටෙන්නොදී
බලා ගෙනම ඉන්න ඕනෙ...

මං දන්නව ඔහේ ඒක කරාවි හරි අපූරුවට..!

පුංචි පුළුං වලහෝ
පුංචි පුළුං වලහෝ







LinkWithin

Related Posts with Thumbnails