අසනීපෙන් - මල් වඩම් අනවශ්‍යයි

පසුවූ නිසා අසනීපෙන් ගිය සතිය
ඔළුවේ නිදහසින් ගතවූයේ නැතිය
තවමත් නැතත් හරිහැටි සුවවූ ගතිය
කිසිවක් නොලිය ඉන්නට සිත නැත රුතිය

හරියට දොලොස් මසකට පෙර මැයි මාසේ
සිදුවූ හදිසි අනතුරකින් වුනු දෝසේ
තවමත් විටින් විට හිස ඔසවයි රහසේ
වදදෙයි කෙලින් සිටිනට බැරි ලෙස බෝසේ

නමගිය වෙදුන් දොස්තරවරු මෙලක තුර
වෙහෙසුන නමුත් තුළ පසුගිය මුළු වසර
සුවකරලනු තබා කුම් වීදැයි සැකැ'ර
කියනට නොහැකි වී ඇති කරුමය කවර

සොලවනු තබා බලනට හරවා දෙපස
නොහැකිව තියේ කකියයි හිස දකුණුපස
නිදියනු පිණිස තැබුවද කොට්ටයට හිස
ගතවෙයි ‍රැයම මොහොතක් නොපියා දෙ ඇස

ඊ ඊ ජී ගොඩකි එක්ස් -රේ තව ගොඩකී
දිග පෙති රවුම් පෙති කරලුත් මහ ගොඩකී
කුමක් කරත් නිසි සුවයක් නැති හැඩකී
බීපු වෙලාවට පමණක් සුවය දකී

කොතරම් ඇති නමුත් ඔලුවේ අමාරුව
සිහි කල්පනාවෙන් අඩුවක් නොමැත තව
එබැවින් ඉවසමින් තද වේදනා බව
පසුවෙමි පුරුදු ලෙස කරමින් රස්සාව

මේ ලෙස ගෙවෙන්නේ සැම දිනයම වාගේ
බියකුත් පවතීය සිත පතුලෙහි මාගේ
මා මලහොතින් වැඩිවීලා මේ රෝගේ
කවුරුද අදින්නේ පවුලේ බර බාගේ


.........................